Áfengi hækkar ekki í verði í dag

Töluvert annríki var undir kvöld í þeim verslunum ÁTVR sem opnar eru lengst eftir að greint var frá frumvarpi um hækkanir á áfengisgjaldi í gær. Ekki var þó nein ástæða til að hamstra vínið enda mun áfengisverð ekki hækka í dag, að sögn Sigrúnar Óskar Sigurðardóttur, aðstoðarforstjóra ÁTVR.

Áfengisgjaldið leggst á innflutning birgja á áfengi, og hækkanirnar skila sér því ekki strax inn í verslanir. Öllu jafna taka verðhækkanir í ÁTVR gildi um mánaðamót en Sigrún getur ekki þó sagt til um það að svo stöddu hvenær koma mun til hækkana vegna áfengisgjaldsins. Að öllu öðru óbreyttu mun fimmtán prósenta hækkun á áfengisgjaldi skila sér í sjö til ellefu prósenta verðhækkun á áfengi. Hins vegar er ekki loku fyrir það skotið að birgjar hækki verðið meira vegna gengisþróunar.

Sigrún segir að þótt nokkuð hafi verið um raðir í verslununum hafi sala dagsins þó verið litlu meiri en á sama fimmtudegi í fyrra, sem þó var ekki fimmtudagur fyrir hvítasunnuhelgi.- sh