Atvinnulaus sjálfstæðismaður á bak við nafnlausu auglýsingarnar

Einn af forsvarsmönnum hóps sem kallar sig Áhugafólk um endurreisn Íslands og birti nýverið umdeildar auglýsingar í Morgunblaðinu og Fréttablaðinu er flokksbundinn sjálfstæðismaður. Hópurinn hefur sent frá sér yfirlýsingu og undir hana skrifa Benedikt Guðmundsson og Sigurður Hjaltested. Í umræddum auglýsingum segir að bæði Vinstri grænir og Samfylkingin hafi talað um skattahækkanir í aðdraganda þingkosninganna. Flokkarnir hafa hinsvegar báðir gert athugasemdir við auglýsinguna og sagt þær uppfullar af rangfærslum. Sigurður segir í samtali við fréttastofu að þeir hafi fengið upplýsingarnar upp úr stefnu og viðtölum við frambjóðendur vinstriflokkanna í fjölmiðlum.

Sigurður er flokksfundinn sjálfstæðismaður. Hann er löggiltur fasteignasali en á milli starfa eins og er. „Ég sé ekki fram á að starfa mikið ef vinstristjórn ætlar að sjá til þess að hækka skattana sem skiptir voða litlu máli þegar allir verða atvinnulausir," segir Sigurður.

„Þetta er það sem flokkarnir hafa verið að segja. Þetta kemur ekki frá okkur heldur beint úr yfirlýsingum þeirra. Við bara túlkum þær og sýnum fram á hvað flokkarnir ætla að fara að gera eftir kosningar," segir Sigurður aðspurður um gangrýni forystumanna Vinstri grænna og Samfylkingarinnar á auglýsingar flokksins.

Í yfirlýsingu hópsins segir að athugasemdir vinstrimanna við auglýsinguna séu fyrst og fremst markverðar vegna þess að þær sýni að þeir séu á flótta undan eigin stefnumörkun örfáum dögum fyrir kosningar.