SI dregur læknaauglýsingu til baka og biðst afsökunar

„Við biðjumst náttúrulega afsökunar á þessu og ætlum að draga auglýsinguna til baka," segir Jón Steindór Valdimarsson, framkvæmdarstjóri Samtaka Iðnarins, en umdeild auglýsing birtist í blöðunum í morgun. Í henni sést heldur óárennilegur læknir vopnaður sprautu. Fyrir framan hann liggur kona með glennta fótleggi.

Forskrift auglýsingarinnar er: Velur þú fagmann eða fúskara?

Feministafélag Ísland er búið að gagnrýna auglýsinguna. Þær vilja meina að myndmálið vísi til ólöglegrar fóstureyðingar - eitthvað sem ekki hefur tíðkast hér á landi í tugi ára.

„Við höfum fengið hörð viðbrögð vegna auglýsingarinnar," segir Jón Steindór sem hefur fengið fjölmörg símtöl og tölvupósta í morgun vegna auglýsingarinnar. Hann segir að það ekki Samtaka iðnaðarins að ögra fólki með þessum hætti, því sé búið að taka þá ákvörðun að draga auglýsinguna til baka.

„Okkar tilgangur er ekki að stuða fólk," segir hann að lokum.