Byggt á fyrra starfsleyfi

„Tillaga Umhverfisstofnunar um starfsleyfi Sorpstöðvar Suðurlands til ársins 2025 er byggð á grunni fyrra starfsleyfis svo og eftirlitsferðum starfsmanna stofnunarinnar á urðunarsvæðið.“

Þetta segir Kristinn Már Ársælsson, upplýsingafulltrúi Umhverfisstofnunar, spurður um forsendur tillögunnar. Hvað varðar brot á gildandi deiliskipulagi segir Kristinn Már þann þátt á hendi sveitarfélagsins. Hins vegar geti fólk beint athugasemdum sem lúta að því að ekki sé hreinlega pláss fyrir meira sorp á svæðinu í Kirkjuferjuhjáleigu til stofnunarinnar.

„Það er venjan í gerð tillagna að starfsleyfum fyrir sorpstöðvar að þau séu til sextán ára,“ útskýrir hann. „Þess vegna er tímalengdin þessi.“

Spurður um hvort athugasemdir hafi borist við tillöguna segir Kristinn Már svo ekki vera. Á borgarafundinum þar sem hún var kynnt íbúum fyrr í vikunni hafi komið fram athugasemdir. En þær verði að vera skriflegar og berast Umhverfisstofnun fyrir 12. júní næstkomandi.

„Borgarafundurinn var haldinn til að fá fram viðbrögð við tillögunni. Við bregðumst við skriflegum athugasemdum ef og þegar þær berast.“ - jss