Faglegar ráðningar og stöður auglýstar

Guðlaugur Þór Þórðarson þingmaður Sjálfstæðisflokksins spurði Steingrím J. Sigfússon fjármálaráðherra út í ráðningar í bönkunum og þeim fyrirtækjum sem ríkið hefur tekið yfir á undanförnum mánuðum í óundirbúnum fyrirspurnum á Alþingi í morgun. Spurði hann hvort stefnan væri að auglýsa stöðurnar. Menn voru léttir.

„Það er að sjálfsögðu stefna ríkisstjórnarinnar að standa skuli faglega að mannaráðningum og stöður að sjálfsögðu auglýstar," sagði Steingrímur og bætti því við að innan skamms yrði eigendastefna ríkisstjórnarinnar skýrð og kynnt.

Guðlaugur kom þá aftur upp í pontu og fagnaði skýrum svörum ráðherrans.

„Það er þá á hreinu að þessi fyrirtæki muni ráða faglega í þessar stöður, það kemur skýrt fram hjá fjármálaráðherra. Það er þá gott að vita að þannig verður unnið og ég þakka hæstvirtum fjármálaráðherra fyrir skýr svör, þetta liggur þá fyrir," sagð Guðlaugur og uppskar nokkurn hlátur í þingsal.

Steingrímur kom þá upp með bros á vör og sagðist skilja sem svo að Guðlaugur hefði verð sérstaklega ánægður með svarið.