Litháarnir áfram í gæsluvarðhaldi

Gæsluvarðhald yfir þremur Litháum sem handteknir voru í tengslum við mál Litháísku stúlkunnar sem trylltist í flugvél á leið hingað til lands um helgina var framlengt fram á miðvikudag í næstu viku í Héraðsdómi Reykjaness fyrir stundu.

Stúlkan sem ferðaðist undir nafninu Leva Grisiúte með stolnum skilríkjum kom hingað til lands með flugi síðastliðið föstudagskvöld og var flutt rænulítil á sjúkrahús eftir að hafa látið ófriðlega í flugvélinni síðasta hluta leiðarinnar.

Talið er að hún sé frá Litháen. Fréttastofa sagði frá því í gær að um borð hafi hún sagst óttast komuna til landsins vegna þess að hún ætti að fara að stunda vændi. Hún dvaldi á sjúkrahúsi aðfararnótt laugardagsins en síðan hjá Lögreglunni á Suðurnesjum að eigin ósk. Á mánudagskvöld hvarf stúlkan síðan frá verustað sínum í Reykjanesbæ og var lýst eftir henni og öðrum Litháa einnig. Ekki er ljóst hvort að hann sé fundinn, en konan kom í leitirnar í gærkvöldi.