Frambjóðendum Heimdallar úthýst af Facebook

„Mér var líka hent út," segir Davíð Þorláksson, frambjóðandi til formanns Heimdallar, en andstæðingur hans og mótframbjóðandi, Árni Helgason, ritaði pistil á vefsvæði sitt þar sem hann tilkynnti að aðgangur hans á Facebook hefði verið afturkallaður. Þar sagðist hann gruna að óprúttnir aðilar hefðu kvartað undan honum á þar til gerðum takka á Facebook síðu sinni.

Aðrir þóttust sjá hörku færast í formannskjörið í þessari stærstu ungliðahreyfingu stjórnmálaflokks hér á landi sem telur sjö þúsund manns.

Báðum formannsframbjóðendunum hefur því verið meinaður aðgangur að síðunni. Aðspurður segist Davíð ekki trúa því að þarna sé um róttæka árás á Heimdall að ræða.

„Ég hélt fyrst að ég væri svona lélegur að logga mig inn," segir hinn tæplega þrítugi Davíð Þorláksson um það þegar hann reyndi að skrá sig inn á Facebook í morgun eins og aðra daga. Þá kom í ljós að reikningur hans var horfinn með öllu.

Hann segist ekki hafa skráð sig inn á samskiptavefinn vinsæla fyrr en í síðasta mánuði en hann notaði Facebook meðal annars til þess að vekja athygli á sér og viðburðum sér tengdum.

Hann segist ekki trúa því að einhver sé svo illviljaður að hann hafi kvartað undan báðum formannsframbjóðendunum með fyrrgreindum afleiðingum. Heldur telur Davíð að Facebook hafi talið þá vera í einhverskonar markaðsstarfi en slíkt er bannað á síðunni.

„Þetta er talsverður missir," segir Davíð enda notaði hann Facebook nokkuð í kynningastarfi sínu. En þó það sé búið að loka aðganginum hans þá er engu að síður hægt að finna stuðningssíðu á Facebook í hans nafni.

Að sögn Davíðs eru hann og Árni í góðu sambandi. Hann segir þá tala saman daglega auk þess sem þeir ræddu málið eftir að þeim var meinaður aðgangur að Facebook.

Missirinn er augljóslega mikill hjá báðum frambjóðendum enda kosningabaráttan að ná hámarki.

Aðspurður hvort Davíð hafi kvartað undan Facebook-reikningi Árna segir hann hlæjandi: „Ég kvartaði ekki undan Árna. Ég kann svo illa á þetta ég lét vin minn setja upp mína eigin síðu."

Kosningarnar fara fram í Valhöll á morgun á milli 20:00 til 22:00.