Stjórnarandstaðan gæti haldið evrópumálum í herkví

Meirihluti er fyrir aðildarviðræðum við Evrópusambandið á Alþingi ef komið verður til móts við skilyrði Framsóknarflokks og Borgarahreyfingar fyrir viðræðum. Sérfræðingur í Evrópusambandsmálum segir að stjórnarandstöðuflokkarnir gætu hins vegar haldið málinu í herkví.

Ríkisstjórnin hyggst leggja fram þingsályktunartillögu um hvort hefja eigi aðildarviðræður að Evrópusambandinu fljótlega eftir að þing kemur saman á föstudag. Ákvörðunin hefur vakið hörð viðbrögð hjá stjórnarandstöðuflokkunum. Eiríkur Bergmann segir útspil ríkisstjórnar óvenjulegt.

„Ríkisstjórnin er auðvitað þverklofin í þessu máli og hefur ekki getað náð saman um afstöðu. Formaður Vinstri grænna hefur hreinlega sagt að þingmenn flokksins séu ekki bundnir af neinu öðru en sannfæringu sinni. Stjórnarandstaðan gæti því tekið þetta mál í hverkví og til að mynda lagst saman með þingmönnum Vg um einhverja allt aðra útfærslu en ríkisstjórnin hefur samið um," segir Eiríkur Bergmann sérfræðingur í málum Evrópusambandsins.

Borgarahreyfingin vill fara í aðildarviðræður að uppfylltum þremur skilyrðum. Að miðlun upplýsinga verði hlutlaus, samninganefndin verði skipuð á faglegum forsendum, og jafnt vægi atkvæða allra landsmanna verði tryggt um þjóðaratkvæðagreiðslu samningsins.

Framsóknarflokkurinn er einnig opinn fyrir aðildarviðræðum en setur nokkur skilyrði sem lúta helst að skýrum og einhliða úrsagnarrétti, fiskimiðum Íslands og landbúnaðarmálum.

Þar sem Samfylkingin hefur 20 þingmenn, Borgarhreyfingin 4 og Framsóknarflokkurinn 9 þá gæti þingsályktunartillagan náð í gegn ef komið væri til móts við kröfur flokkanna beggja, óháð samþykki vinstri grænna og Sjálfstæðisflokksins.