Martinez neitar að hafa tjáð sig um Ferguson

Breskir fjölmiðlar margir hverjir birtu í dag þýtt viðtal úr spænska blaðinu AS þar sem knattspyrnustjórinn Roberto Martinez hjá Wigan fullyrðir að knattspyrnustjórinn Sir Alex Ferguson hjá Manchester United fái sérmeðferð hjá enska knattspyrnusambandinu.

Þar kemur einnig fram að Ferguson sé bakkaður upp í einu og öllu af kollegum sínum Steve Bruce og Sam Allardyce og fleirum sem sameinist svo um að leggja knattspyrnustjórann Rafa Benitez hjá Liverpool í einelti. Wigan gaf hins vegar frá sér yfirlýsingu rétt í þessu þar sem segir að Martinez kannist ekkert við umrætt viðtal.

„Roberto Martinez vill koma því á framfæri að hann harðneitar því að hafa tjáð sig um Sir Alex Ferguson eða málefni tengd honum í viðtali sem hefur farið vítt og breytt um breska fjölmiðla í dag. Martinez hefur því kært málið til sambands knattspyrnustjóra á Englandi," segir í yfirlýsingu Wigan.