Átján á spítala vegna svínaflensu

Átján einstaklingar lágu á Landspítala síðdegis í gær af völdum svínaflensunnar. Þrír voru á gjörgæslu, hinir sömu og legið hafa þar undanfarna daga. Guðrún Sigmundsdóttir, yfirlæknir á sóttvarnasviði landlæknisembættisins, sagði að einn sjúklingur hefði verið útskrifaður og sex nýir bæst við.

„Flensan er á hraðri uppleið á höfuðborgarsvæðinu,“ segir hún. „Það er ekki hægt að segja til um það nú hvenær hún muni ná toppi. Þróunin hefur verið heldur hægari á landsbyggðinni en flensutilfellum fjölgaði þó um og upp úr síðustu helgi. Ég hef frétt af einum einstaklingi sem lagður var inn á spítala á Akureyri og öðrum á sjúkrahúsinu á Egilsstöðum.“

Hvað skólana varðar segir Guðrún að í sumum þeirra virðist veikindin stinga sér niður og tilfellum þá fjölga hratt, en annars staðar sé heilsufar í lagi.

Guðrún segir vonir standa til þess að bóluefnið sem kemur til landsins dragi úr faraldrinum.

Þeir sem lagðir hafa verið inn á spítala af völdum svínaflensunnar eru á aldrinum eins árs til 73 ára og eru flestir með undirliggjandi áhættuþætti. - jss