Ráðherra hlíti nefnd eða leiti samþykkis Alþingis fyrir dómaraskipan

Sömu reglur munu gilda um skipan hæstaréttardómara og héraðsdómara nái tillögur nefndar, sem Ragna Árnadóttir dómsmálaráðherra kynnti í ríkisstjórn í morgun, fram að ganga. Dómnefnd mun þá gefa umsögn um hæfi umsækjenda um dómarastöður en hingað til hafa hæstaréttadómarar gefið umsögn um hæfi umsækjenda í stöðu hæstaréttardómara.

Í tillögunum sem dómsmálaráðherra kynnti í morgun er jafnframt gert ráð fyrir að fjölgað verði í dómnefnd. Þá verði skipunarvaldið áfram hjá dómsmálaráðherra, en ákveði hann að skipa annan en dómnefndin mælir með, verði hann að leggja tillögu um skipun annars hæfs umsækjanda fyrir Alþingi.

Ráðherra hyggst nú leita sjónarmiða um tillögur nefndarinnar og gefst áhugasömum tækifæri til að senda ábendingar á netfangið umsogn@dmr.stjr.is fyrir 15. nóvember næstkomandi.