Yfirsjúkraþjálfari Portsmouth: Hermann getur verið harðhentur

Landsliðsfyrirliðinn Hermann Hreiðarsson hefur ekkert getað leikið með Portsmouth á yfirstandandi tímabili í ensku úrvalsdeildinni vegna meiðsla en Gary Sadler, yfirsjúkraþjálfari Portsmouth, segir í viðtali við pfcTV að Hermann eigi ekki langt í land með að verða leikfær á nýjan leik.

„Hermann er búinn að leggja mjög hart að sér í endurhæfingunni því hann vill ólmur byrja að spila. Raunar þurfum við að halda aftur af honum og það er ekki auðvelt þegar maður eins og Hermann er annars vegar. Við fáum yfirleitt að kenna á því. Hann getur stundum verið dálítið harðhentur," segir Sadler og hlær við.

Hermann verður því líklega ekki með Portsmouth gegn Hull í mikilvægum fallbaráttuslag á morgun.