Kýld fyrir peninga

Tveir meðlimir Kardashian-fjölskyldunnar stigu inn í hnefaleikahringinn þar sem þau öttu kappi við fólk sem hafði greitt háar fjárhæðir til þess að geta lúskrað á einum Kardashian. Loturnar fóru fram í Commerce-spilavítinu í Kaliforníu og var hluti af góðgerðaviðburði sem haldinn var til að safna fé til styrktar samtökunum Dream Foundation.

Það voru systkinin Rob og Kim Kardashian sem öttu kappi við karlmann og konu og lauk bardögunum á þann veg að Rob var fluttur á sjúkrahús en Kim fékk stærðarinnar glóðarauga. „Rob missti hjálminn sinn og þegar hann beygði sig eftir honum fékk hann högg í höfuðið og endaði á spítala með heilahristing. Við vorum öll miður okkar vegna þessa. Stúlkan sem ég barðist við var hörð og sú gat látið höggin dynja," skrifaði Kim á bloggsíðu sinni eftir bardagann.