Ögmundur hættir hjá BSRB í haust

Ögmundur Jónasson ætlar að láta af starfi formanns BSRB í haust. Þetta kemur fram í viðtali við Ögmund í maíhefti BSRB tíðinda.

„Sama hvernig þessar kosningar fara, og óháð því hverjar verða lyktir um stjórnarsamstarf eða hugsanlegan ráðherradóm minn, þá mun ég á næsta þingi bandalagsins í haust formlega láta af formennsku í BSRB. Verði framhald á stjórnarsamstarfinu yrði ég væntanlega formaður in absentia eins og ég hef verið frá því ný ríkisstjórn tók við í byrjun febrúar. Frá þeim tíma hef ég ekkert komið að stjórn bandalagsins," er haft eftir Ögmundi.

Nú hefur Ögmundur verði endurkjörinn á þing og fátt bendir til annars en að hann muni halda ráðherrastóli sínum í heilbrigðisráðuneytinu.