Skódinn eyddi 3,02 lítrum á hundraði

„Þetta gekk frábærlega vel. Veðrið lék við áhorfendur og við erum auðvitað þakklát veðurguðunum fyrir það, því það skiptir miklu máli að ekki sé hávaðarok. Fjöldi keppenda var fullkominn, ekki of margir og ekki of fáir,“ segir Hugi Hreiðarsson, einn af forsvarsmönnum hinnar árlegu Sparaksturskeppni Atlantsolíu og Félags íslenskra bifreiðaeigenda sem haldin var í fyrradag.

Tuttugu og tveir bílar voru skráðir til leiks í gær og keppt í sjö flokkum. Keppninni er ætlað vekja athygli á því að hægt sé að draga verulega úr eldsneytisnotkun með réttu aksturslagi. Það var Þorbjörg Helga Vigfúsdóttir, formaður umhverfis- og samgönguráðs Reykjavíkurborgar, sem ræsti keppnina við bensínstöð Atlantsolíu í Bíldshöfða.

Ekið var austur Þingvallaveg, Grafning og Grímsnes og lauk fyrri hluta keppninnar með tímatöku við bensínstöð Atlantsolíu á Selfossi. Eftir tímatökuna var ekið rakleitt yfir Ölfusárbrú suður Eyrarbakkaveg og um Þrengsli til Reykjavíkur.- kg