Býst ekki við frekari töfum á bólefninu

Haraldur Briem, sóttvarnalæknir, á ekki von á frekari töfum á að bólefni gegn svínaflensu komi til landsins. „Við erum ítrekað búin að ganga á eftir þessu og það er búið að fullyrða við okkur að þetta komi í lok mánaðarins."

Stjórnvöld hafa keypt 300 þúsund skammta af bóluefninu og átti lyfið að koma til landsins um síðustu mánaðarmót. Ekkert varð af því vegna tafa hjá framleiðanda.

Haraldur á von á því að byrjað verði að bólusetja fólk hér á landi strax í byrjun nóvember. Um leið og bóluefnið komi verði því dreift um allt landið, en, bólusetningin mun í flestum tilfellum fara fram á heilsugæslustöðvum.

Allir einstaklingar sex mánaða og eldri með undirliggjandi sjúkdóma verða bólusettir í fyrstu. Það sama á við óléttar konur, heilbrigðisstarfsfólk, lögreglumenn og slökkviliðsmenn.