Sigmundur: Jóhanna spillir fyrir að lánið fáist

Íslendingum stendur ekki til boða að fá risalán frá Noregi upp á rúma tvö þúsund milljarða króna. Þetta kemur fram í svarbréfi Jens Stoltenbergs, forsætisráðherra Noregs, til Jóhönnu Sigurðardóttur, forsætisráðherra. Framsóknarmenn saka Jóhönnu um að senda villandi skilaboð til Noregs til að koma í veg fyrri að lánið fáist.

Oddvitar Framsóknarflokksins fullyrtu í síðustu viku að Norðmenn gætu hugsanlega lánað Íslendingum, milliliðalaust, 100 milljarða norskra króna eða sem samsvarar um 2200 milljörðum íslenskra króna.

Vísuðu framsóknarmenn í samtöl sem þeir áttu við oddvita Miðflokksins í Noregi, sem er einn af þremur stjórnarflokkum þar í landi.

Jóhanna Sigurðardóttir, forsætisráðherra, sendi starfsbróður sínum í Noregi bréf í síðustu viku og spurði hvort slíkt lán væri í boði.

Samkvæmt upplýsingum frá forsætisráðuneytinu kemur fram í svarbréfi norska forsætisráðherrans, að slíkt lán hafi ekki verið rætt í norsku ríkisstjórninni. Þá er ennfremur vísað til þess að Norðmenn ætli að lána Íslendingum í samvinnu við önnur Norræn ríki. Þau lán séu bundin uppgjöri Icesave og endurskoðun Alþjóðagjaldeyrissjóðsins. Allur stuðningur við Ísland verði innan þess ramma.

Sigmundur Davíð Gunnlaugsson, formaður Framsóknarflokksins, segir að Stoltenberg hafi svarað bréfi Jóhönnu án þess að bera það undir samstarfsflokka sína í ríkisstjórn. Hann sakar Jóhönnu um að senda villandi skilaboð til Noregs.

„Okkur var ítrekað tjáð þarna úti að Verkamannaflokkurinn líti ítrekað til Samfylkingarinnar með hvaða stefnu ætti að taka í málinu. Jafnframt að það hafi komið allt annað en beiðni um lánafyrirgreiðslu frá Samfylkingunni," segir Sigmundur.

Sigmundur sakar Jóhönnu og Samfylkinguna um að reyna spilla fyrir málinu og segir ennfremur að Samfylkingin vilji halda sig fast við áætlun Alþjóðagjaldeyrissjóðsins og sé ekki tilbúin að skoða aðrar leiðir.

Þá segir Sigmundur að Miðflokkurinn í Noregi ætli að taka upp málið í ríkisstjórn á næstu dögum.