Margir vilja vinna í Valhöll

Yfir 140 umsóknir bárust um tvö störf á skrifstofu Sjálfstæðisflokksins en umsóknarfrestur rann út fyrr í vikunni. Jónmundur Guðmarsson, framkvæmdastjóri flokksins, segir fjölda umsókna hafa farið fram úr björtustu vonum.

„Við ákváðum að fara þessa nýju leið, að auglýsa eftir fólki, þar sem okkur langaði til að gefa hverjum sem áhuga hefði tækifæri til að starfa fyrir flokkinn. Þessi fjöldi umsókna kemur okkur samt sem áður ánægjulega á óvart og í raun finnst mér verst að geta ekki virkjað alla þessa sterku einstaklinga í til starfa," er haft eftir Jónmundi á vefsíðu Sjálfstæðiflokksins.

Störfin sem um ræðir eru á nýju samskiptasviði flokksins. Er stofnun þess hluti skipulagsbreytinga í Valhöll, sem eiga að vera komnar að fullu til framkvæmda 1. desember, að fram kemur á vef Sjálfstæðisflokksins. Er breytingunum ætlað að skerpa núverandi áherslur í flokksstarfinu og auka þjónustu við flokksmenn og kjörna fulltrúa.