Umhverfisvæn fatahönnun

Hollenski fatahönnuðurinn Jette Korine kom fram með sína fyrstu fatalínu undir eigin nafni í lok sumars. Línan, sem heitir Endless Light, var öll unnin úr umhverfisvænum efnum og litum og seldist upp á skömmum tíma. Nú vinnur Jette að því að koma frá sér vetrarlínu með ullarkápum og fylgihlutum.

„Ég er enn að þróa kápurnar og fékk fyrstu frummyndina í hús fyrr í vikunni. Kápurnar eru gerðar úr gömlum ullarteppum sem voru notuð í neyðarskýlum áður fyrr, en þrátt fyrir að teppin séu gömul eru þau alveg óslitin," segir Jette.

Kápurnar verða seldar bæði hér á landi og erlendis og verður hægt að klæðast kápunni einni og sér eða kaupa gærufóður til að gera hana hlýrri og vaxlag sem hægt er að setja yfir kápuna og verja hana gegn rigningu og snjó.

„Mig langar að hanna flíkur sem eru fjölnota, þannig að hægt sé að klæðast þeim við öll tækifæri. Ég legg líka mikið upp úr því að flíkurnar séu unnar úr náttúrulegum efnum og á umhverfis­vænan máta."

Jette er þegar komin með hugmyndir að væntanlegri vor- og sumar­línu.

„Ég mun ekki hefjast handa við næstu línu fyrr en vetrar­línan er tilbúin og búið er að selja þær flíkur, eins og er er allt enn á kafi í ullarhnoðrum á vinnustofu minni. Það er mjög þægilegt fyrir mig sem hönnuð að geta einbeitt mér alfarið að einum hlut, eins og kápunum, og þurfa ekki að hugsa um ótal hluti í einu. Ég vinn mjög vel undir þessum kringumstæðum," segir Jette að lokum.

Áhugasömum er bent á vefsíðuna www.jetkorine.com. sara@frettabladid.is