Samfélagið lítur enn á karlmenn sem fyrirvinnu

Samfélagið lítur enn á karlmenn sem fyrirvinnu og krefst þess að þeir eyði miklum tíma á vinnustaðnum. Þá er enn litið svo á að konur beri meginábyrgð á heimilisstörfum og umönnun barna. Þetta kemur fram í nýrri doktorsritgerð um kynjajafnrétti.

Morgunblaðið greinir frá þessu í dag. Höfundurinn, Gyða Margrét Pétursdóttir, varði doktorsritgerðina í Háskóla Íslands í gær. Í henni kemur fram að karlar hafi yfirleitt meiri sveigjanleika í starfi en konur og því meiri möguleika á að samræma fjölskyldulíf og atvinnu. Þrátt fyrir að konur hafi minni sveigjanleika í starfi sé enn litið svo á að þær beri ábyrgð á heimilinu. Gyða skoðaði vinnuumhverfið í opinbera geiranum og einkageiranum.

Þá rannsakaði höfundur einnig samskipti kynjanna á heimilinu og hvernig launamunur kynjanna hefur áhrif á samskipti karla og kvenna. Gyða segir að konur séu nánast undantekningalaust með lægri laun en karlar sem valdi því að þær sinni börnunum í meira mæli. Hún segir að þetta sé keðja sem þurfi að brjóta upp svo karlar og konur hafi sömu möguleika á vinnumarkaði og inn á heimilinu.