Bjartsýnni eftir viðræðufund

Formlegar stjórnar-myndunarviðræður hófust í gær og voru formenn stjórnarflokkanna bjartsýnni eftir fyrsta fund, raunar bjartsýnni eftir fund en fyrir. Bæði Jóhanna og Steingrímur segja það sögulega skyldu vinstri flokkanna að mynda þessa stjórn.

„Ég er bjartsýnni eftir að ég kom út af fundinum en áður en ég fór inn. Það hefur ýmislegt skýrst og ég tel að við munum ná ásættanlegri niðurstöðu í Evrópumálum," segir Jóhanna Sigurðardóttir. Steingrímur J. Sigfússon tekur undir það. „Það er gagnkvæmur og sterkur vilji til samstarfs til staðar og ég er bjartsýnni eftir fundinn en fyrir."

Á fundinum í gær voru skipaðir viðræðuhópar um Evrópumál og um breytingar á stjórnsýslu. Varaformennirnir leiða hópinn um Evrópu, en þeir Ögmundur Jónasson og Össur Skarphéðinsson sitja einnig í hópnum. Hinn hópurinn verður skipaður í dag. Þá verður á næstunni skipað í hópa um efnahagsmál og atvinnumál.

Formennirnir leggja áherslu á að hér sé starfandi meirihlutastjórn og því liggi minna á en ella. Ólafur Ragnar Grímsson forseti áréttaði þetta þegar Jóhanna sótti umboð til stjórnarmyndunar að Bessatöðum í gær. Hann sagði enga þörf á því að setja tímamörk á hvenær viðræðum flokkanna um frekari aðgerðir eða verkefni kunni að ljúka, í ljósi þess að minnihlutastjórnin hafi hlotið meirihluta í kosningunum.

Báðir flokkarnir höfðu innköllun aflaheimilda á stefnuskrá sinni fyrir kosningar. Steingrímur segir að sest verði yfir það mál eins og önnur. Jóhanna segir það ljóst að stjórnin muni ráðast í breytingar á sjávarútvegsstefnunni.

Ljóst er hins vegar að samningur um Evrópumál er forsenda stjórnar.- kóp, bj /