Ekki tilefni til rannsóknar á störfum Guðlaugs Þórs hjá OR

Innri endurskoðun Reykjavíkurborgar hefur tilkynnt Guðlaugi Þór Þórðarsyni að ekki verði orðið við beiðni hans um að störf hans fyrir Orkuveitu Reykjavíkur verði tekin út þann tíma sem hann var stjórnarformaður Orkuveitunnar. Guðlaugur Þór óskaði eftir úttektinni í kjölfar mikillar umræðu um styrkjamál stjórnmálamanna en hann þáði tveggja milljóna króna styrk frá FL Group á sama tíma og hann var stjórnarformaður í OR. FL Group varð síðar einn stærsti hluthafi í Geysi Green Energy sem sameina átti REI sem var í eigu OR. Guðlaugur Þór lét  af embætti stjórnarformanns OR nokkrum mánuðum áður en þær sameiningarviðræður áttu sér stað.

Þessi ákvörðun Innri endurskoðunnar er tekin í því ljósi að ítarlega hefur verið fjallað um málefni OR og REI, meðal annars á vettvangi stýrihóps borgarráðs um málefni REI og OR, auk þess sem þrír lykilgerendur í málinu hafi skrifað greinargerð um atburðarrásina í aðdraganda sameiningar REI og GGE. Þá hafi Innri endurskoðun gert stjórnsýsluúttekt á Orkuveitunni sem birt var í ágúst á síðasta ári.

Í bréfinu til Guðlaugs er bent á að Umboðsmaður Alþingis hafi með bréfi í október 2007 óskað eftir upplýsingum frá eigendum OR sem kynnu að varpa ljósi á meðferð valds og eftirlits sem sveitarstjórnir hafa með höndum sem eigendur OR. Sú rannsókn mun enn vera í vinnslu hjá Umboðsmanni.

„Á grundvelli ofangreinds er það niðurstaða undirritaðs að ekki sé tilefni til úttektar IE á störfum þínum fyrir OR þann tíma sem þú varst stjórnarformaður fyrirtækisins," segir í niðurlagi bréfsins sem undirritað er af Halli Símonarsyni, innri endurskoðanda Reykjavíkurborgar.