Þingmenn í tvöfaldri vinnu

Þingmennirnir Kristján Þór Júlíusson og Birkir Jón Jónsson starfa báðir sem sveitarstjórnarmenn auk þess sem þeir sinna þingmennsku. Kristján Þór situr fyrir Sjálfstæðisflokkinn í bæjarstjórn Akureyrar en Birkir Jón sinnir sveitastjórnarmálum í Fjallabyggð auk þess sem hann er þingmaður. Þá voru sex sveitastjórnarmenn kosnir inn á þing nú á laugardaginn. Þar á meðal Svandís Svavarsdóttir, oddviti Vinstri grænna í Reykjavík.

Kristján Þór er ekki eingöngu bæjarfulltrúi heldur einnig forseti bæjarstjórnar Akureyrar. Sem slíkur fær hann 206.946 krónur á mánuði en það leggst ofan á þingfarakaup sem eru í kringum 550 þúsund krónur. Hann er því með minnst rúmar 750 þúsund krónur á mánuði.

Nýkjörnir þingmenn sem einnig sinna sveitastjórnarmálum eru Ásbjörn Óttarsson sem kemur nýr inn fyrir Sjálfstæðisflokkinn. Hann situr í bæjarstjórn Snæfellsbæjar. Unnur Brá Konráðsdóttir, Sjálfstæðiskona, er sveitastjóri í Rangáþingi eystra. Oddný G. Harðardóttir, Samfylkingunni, er bæjarstýra í Garði. Þá er Jónína Rós Guðmundsdóttir, Samfylkingunni, formaður bæjarráðs Fljótsdalshéraðs. Að lokum þá er Framsóknarmaðurinn Gunnar Bragi Sveinsson oddviti Framsóknarflokks í sveitarstjórn Sveitarfélagsins Skagafirði.