Svörtuloft keyrð út til lesanda á sunnudagsmorgun

„Mér líst alveg ágætlega á þetta framtak og kalla þetta nú góða þjónustu," segir Arnaldur Indriðason, rithöfundur. Nýjasta bók hans, Svörtuloft, kemur út, samkvæmt öllum hefðum og reglum, þann 1.nóvember. Sá dagur ber hins vegar upp á sunnudegi sem er ekki alveg besti dagurinn til bókakaupa og því hefur starfsfólk Eymundsson ákveðið að keyra bókina út til þeirra sem tryggja sér eintak í forsölu. Arnaldur kveðst ekki viss um hvort hann myndi nýta sér svona ókeypis heimsendingu á bók eftirlætishöfundar síns ef hún væri í boði. „Það má samt alveg vel vera."

Ingþór Ásgeirsson hjá Eymundsson segir þetta hafa verið gert einu sinni áður og þá með Harry Potter. „Þetta er hins vegar nýtt með íslenska bók og starfsfólkið er ákaflega spennt fyrir þessu framtaki," útskýrir Ingþór og bætir því við að heppnir aðdáendur Arnaldar fái rjúkandi morgunkaffi með. „Örugglega eru margir sem bíða spenntir eftir Svörtuloftum því bækur Arnaldar eru eiginlegar hættar að vera bara jólagjöf, fólk kaupir sér þær fyrir sjálft sig, það getur ekki beðið til jóla." Ingþór er hvergi banginn við þann fjölda sem hugsanlega mun nýta sér þjónustuna, segist vera með ökumenn á bakvakt sem geti auðveldlega komið til bjargar ef fjöldin verður gríðarlegur. Hann tekur jafnframt fram að þessi heimsending verður í boði fyrir þá staði úti á landi þar sem Eymundsson er með verslun.

En þá aftur að Arnaldi. Samkvæmt síðustu tölum frá réttindaskrifstofu Forlagsins er hann nú að verða búinn að selja sex milljónir eintaka á heimsvísu. Fréttablaðið greindi frá því í fyrra að fimm milljónir eintaka væru seldar og því er þetta um ein milljón eintaka á einu ári sem Arnaldur hefur selt. „Þetta er býsna flott, salan fer mest vaxandi á Spáni og í Frakklandi en þeir síðastnefndu hafa verið mjög áhugasamir um verk mín, það hefur eiginlega komið mér mest á óvart." Arnaldur hefur einnig fengið frábæra dóma á Bretlandi að undanförnu en höfundurinn telur þann markað vera mun erfiðari en fólk geri sér grein fyrir. „Þeir þýða sáralítið og það er mjög erfitt að ná einhverjum árangri þar í sölu. Þeir láta sér yfirleitt nægja að gefa út enskumælandi höfunda en dropinn holar steininn, vonandi, bækurnar hafa fengið góðar viðtökur og unnið til verðlauna."

freyrgigja@frettabladid.is