Nýjar útfærslur breyta ekki afstöðu stjórnarandstöðu

Ekki tókst að ná þverpólitískri samstöðu um lausn á deilum vegna Icesave-samkomulagsins á fundi fulltrúa allra flokka í gær, eins og vonir höfðu staðið til. Til stóð að ljúka umræðum um málið í fjárlaganefnd í dag og hefja aðra umræðu á Alþingi á morgun, en fullljóst er talið að af því verði ekki.

Fulltrúar allra flokka í fjárlaganefnd áttu óformlegan fund í gær þar sem rætt var um frumvarp stjórnvalda um ríkisábyrgð vegna Icesave-samningsins. Þar lagði Guðbjartur Hannesson, formaður nefndarinnar, fram nýjar tillögur að mögulegum fyrirvörum Alþingis við frumvarpið.

Fundarmenn vildu í gær ekki upplýsa hvað kæmi fram í tillögunum, en heimildir Fréttablaðsins herma að um sé að ræða útfærslur á fyrirvörum sem hafi áður verið til umræðu. Þeir fyrirvarar snúast til dæmis um þróun efnahagsmála hér á landi næstu árin, greiðslugetu landsins og lagalega þætti.

Engin samstaða náðist um tillögurnar í gær, en fyrir fundinn virtust fulltrúar stjórnarmeirihlutans fremur vongóðir um að málið væri að leysast. Fjárlaganefnd mun funda um málið í dag.

„Ég er mjög efins um að við værum að gera rétt með því að sauma saman einhverja fyrirvara," segir Höskuldur Þórhallsson, fulltrúi Framsóknarflokks í nefndinni.

„Það væri hreinlegast að segja við Breta og Hollendinga að það sé ekki meirihluti fyrir þessu á Alþingi, og senda nýja samninganefnd til að reyna að ná mannsæmandi samningi," segir Höskuldur.

Þingmenn sem rætt var við í gær fullyrða að ekki sé þingmeirihluti fyrir því að samþykkja stjórnarfrumvarpið, hvort sem er með fyrirvörum eða óbreytt.

„Ég hefði talið eðlilegast að Alþingi lýsti því yfir að sátt væri um að semja um Icesave, en ekki á þessum grunni," segir Kristján Þór Júlíusson, fulltrúi Sjálfstæðisflokksins í fjárlaganefnd. Hann segir að leita verði samninga á öðrum grunni en gert hafi verið. Enginn sé að útiloka fyrirfram að gera einhvers konar fyrirvara við þann samning sem gerður hafi verið og vinna út frá því. Vandi ríkisstjórnarinnar sé sá að ekki sé meirihluti fyrir þeirri lausn.

Þór Saari, fulltrúi Borgarahreyfingarinnar í fjárlaganefnd, segist vonast til þess að sátt náist um fyrirvara við frumvarp ríkisstjórnarinnar. Náist sátt um þá sé það Breta og Hollendinga að hafa frumkvæði að því að semja að nýju. Fyrirvararnir geri því vart annað en að styrkja samningsstöðu Íslands.- bj