Biðlistar í afplánun þrefaldast á sex árum

Fólki sem bíður eftir að komast í afplánun í fangelsum landsins hefur fjölgað úr 53 árið 2003 í 182 nú. Skýringin er þynging refsidóma, segir Páll Winkel fangelsismálastjóri. Meðalrefsitími hafi til dæmis lengst um þriðjung frá árinu 2006.

„Okkur ber að framfylgja öllum fangelsisdómum. Ef hver maður sem fer í fangelsi þarf að vera þriðjungi lengur inni segir það sig sjálft að plássin teppast lengur. Við getum ekki losað nógu mörg pláss til að tæma boðunarlistann," segir hann.

Páll nefnir sérstaklega að nú séu að falla þyngri dómar fyrir kynferðis- og fíkniefnabrot en áður. Þannig taki skútusmyglmálin tvö sinn toll af 136 fangaplássum landsins. Fimm sitja inni fyrir þátt sinn í fyrra málinu og sex sitja í varðhaldi vegna þess síðara. Þá má búast við mörgum í afplánun vegna kannabisverksmiðja sem upprættar hafa verið nýlega.

Páll segir að hingað til hafi tekist að láta alla hættulega menn hefja afplánun strax. „Það mun ekkert breytast. Þetta þýðir að aðrir þurfa að bíða lengur eftir að komast í afplánun og þeir gætu þurft að bíða mjög lengi, nokkra mánuði eða ár."

Byggingu nýs fangelsis hefur verið frestað og því er engin von til þess að biðlistarnir styttist í bráð, segir Páll. Þeir hafi lengst stöðugt síðustu ár og ekkert lát virðist á þeirri þróun. Eigi þeir að styttast þurfi að fjölga rýmum og úrræðum til afplánunar utan fangelsa. Þá er rafrænt eftirlit einnig til skoðunar.