Völuspá Þorvaldar Bjarna

Þorvaldur Bjarni Þorvaldsson hefur látið lítið fyrir sér fara að undanförnu en mun nú brjótast fram á sjónvarsviðið á nýjan leik þegar hljómsveitin Todmobile heldur upp á afmæli sitt 4. nóvember.

Nýtt lag, Ertu ekki að djóka í mér?, var frumflutt á Bylgjunni á föstudaginn en Þorvaldur hefur síður en svo setið með hendur í skauti og beðið eftir afmælisdeginum. Hann flaug út til Parísar á sunnudagsmorgun til að fylgja eftir sinfóníutónleikum Lady & Bird í höfuðborg Frakklands. „Þetta er mikill heiður fyrir okkur því hljómsveitin sem flytur þetta er ein sú virtasta í Evrópu,“ segir Þorvaldur en uppselt er á þessa tónleika sem verða á miðvikudaginn.

Fleira er í farvatninu hjá Þorvaldi því hann notaði tímann vel þegar hann dvaldist í nokkra mánuði í ítalska héraðinu Toscana fyrir um ári. „Ég hef verið að finna verk upp úr Völuspá sem er fyrir sinfóníuhljómsveit, kór og sópransöngkonu. Ég er að leggja lokahönd á það verk og vonandi kemur það fyrir augu og eyru almennings í vor eða sumar,“ útskýrir Þorvaldur og bætir því við að það hafi verið frábært að semja á Ítalíu. „Þetta var viðeigandi staður til að skrifa svona verk og maður getur ekki beðið eftir því að þetta fari allt saman upp. Að gera svona krefst alveg gríðarlegrar frágangsvinnu og það er mikið ferli sem tekur við þegar maður er búinn að semja.“ En eins og verk upp úr Völuspá væri ekki nóg fyrir einn mann þá hefur Þorvaldur einnig verið að vinna að óperu/söngleik með Spaugstofukónginum Karli Ágústi Úlfssyni. Þorvaldur vildi alls ekki upplýsa hvaða verk það væri, slíkt kæmi bara í ljós þegar það færi á fjalirnar.

Tónskáldið og upptökustjórinn hefur haft það fyrir venju að raka sig ekki á meðan mestu tarnirnar standa yfir. Og kannski er það til marks um hversu mikið hefur verið að gera að Þorvaldur segist aldrei hafa haft svona mikið skegg. „Nei, þetta er kannski fullmikið af hinu góða, skeggið er alveg að kæfa mig.“

freyrgigja@frettabladid.is