„Við erum bara í sjokki," segir systir Selmu Guðnadóttur sem situr í gæsluvarðhaldi eftir að hafa stungið fimm ára gamla telpu í bringuna í Reykjanesbæ um helgina.
Hinn 22 ára gamla Selma var handtekin á heimili móður sinnar í hádeginu á sunnudaginn eftir að hafa stungið telpuna fyrirvaralaust í bringuna með eldhúshnífi. Af hlutust lífshættulegir áverkar. Áður hafði fjölskyldan kært hana fyrir eignaspjöll á heimili sínu og mótorhjóli.
„Hún sefur mikið í gæsluvarðhaldinu, en hún hefur alltaf sofið mikið," segir systir Selmu sem er enn í áfalli eftir að hafa fengið fréttirnar um systur sína á sunnudaginn.
„Ég snappaði bara þegar ég heyrði þetta," segir hún um fyrstu viðbrögð sín þegar hún heyrði af ódæðinu. Fjölskyldan er í sárum að hennar sögn.
Fimm ára stúlkan var flutt með hraði á Landspítalann í Reykjavík eftir árásina. Í fyrstu var hlynnt að henni á gjörgæslu. Hún var fljótlega útskrifuð þaðan og er nú á barnaspítalanum.
Samkvæmt föður stúlkunnar, Óskari Harðarsyni, þá er hún öll að koma til: „Hún er úr stáli," sagði hann í viðtali við Stöð 2 í gær.
Selma var úrskurðuð í vikulangt gæsluvarðhald í gær. Að auki er henni gert að sæta geðrannsókn. Selma játaði verknaðinn skýlaust en ekki er ljóst hvað henni gekk til með ódæðinu.
„Hún er bara veik," segir systir hennar en fjölskyldan hefur þurft að þola margt í gegnum tíðina að hennar sögn. „Ég trúi ekki enn þá að hún hafi gert þetta," segir systir hennar sem er brugðið.
Aðspurð hvort hún viti hversvegna Selma stakk stúlkuna segist hún ekki hafa svör á reiðum höndum.
Systirin segir að Selma hafi það ágætt í gæsluvarðhaldinu. Síðast hafi móðir hennar farið með föt og liti í fangelsið til Selmu en hún mun vera mikill listamaður þegar hún tekur sig til að sögn systur hennar.
Spurð hvað taki nú við hjá Selmu segist systir hennar ekki vita það.
„En það á ekki að hleypa henni út," segir hún og fordæmir ódæði Selmu um leið.
Málið er enn í rannsókn lögreglunnar á Suðurnesjum.
