Mikilvægt að þjónusta við áhættufæðingar sé fyrir hendi

Það er brýnt að þjónusta við áhættufæðingar sé fyrir hendi í heimabyggð, segir formaður Samtaka sunnlenskra kvenna. Hugmyndir eru um að leggja niður keisaraskurði í hagræðingarskyni á Akranesi og Reykjanesbæ.

Hugmyndir eru um að leggja niður keisaraskurði á sjúkrahúsunum í Keflavík og á Akranesi. Þetta hefur þó ekki verið endanlega ákveðið.

Rosemarie Þorleifsdóttir, formaður Samtaka sunnlenskra kvenna, á sæti í samráðshópi um sjúkrahús í nágrenni höfuðborgarinnar. Henni finnst brýnt að þessi þjónusta verði áfram fyrir hendi á Selfossi, enda geti Hellisheiði lokast á vetrum. Almennt telur hún að þjónusta af þessu tagi eigi að vera sem næst þeim sem á henni þurfa að halda.

Rosemarie segir að oft sé það svo um áhættufæðingar að konur fari til höfuðborgarinnar. En það geti stundum verið mjög erfitt fyrir ófrískar konur.