Fóstureyðingum fjölgar

Á árinu 2008 voru skráðar 955 fóstureyðingar hjá konum með lögheimili á Íslandi, sem er nokkuð meira en undanfarin ár (905 árið 2007). Þetta kemur fram á vef Landlæknis um fóstureyðingar á Íslandi.

Árið 2008 voru framkvæmdar 13,8 fóstureyðingar á hverjar 1.000 konur á aldrinum 15-44 ára (13,9 árið 2007) og sé litið til fjölda fóstureyðinga miðað við hverjar 1.000 fæðingar þá voru þær ríflega 198 (192 árið 2007).

Árið 2008 voru framkvæmdar 520 ófrjósemisaðgerðir hérlendis, 181 hjá konum og 339 hjá körlum. Þetta eru heldur fleiri aðgerðir en árið á undan en færri en árin 2005 og 2006. Sem fyrr fjölgar þeim körlum hlutfallslega sem gangast undir ófrjósemisaðgerðir en konum fækkar hins vegar.

Árið 2008 voru framkvæmdar 4,6 ófrjósemisaðgerðir á hverja 1.000 karla í aldurshópnum 25-54 ára en 2,8 ófrjósemisaðgerðir á hverjar 1.000 konur í sama aldurshópi.