Rússnesk stórmynd á Íslandi

„Þetta er stórmynd og mjög stórt verkefni fyrir okkur,“ segir Kristinn Þórðarson hjá framleiðslufyrirtækinu Saga Film um nýjustu mynd rússneska leikstjórans Aleksandr Sokurov.

Myndin verður tekin að hluta til á Íslandi og með íslenskum leikurum. Sokurov sótti Ísland heim í maí og voru haldnar stórar áheyrnarprufur í samstarfi við Eskimó.

„Hann var mjög spenntur að hitta íslenska leikara og hitti fjölmarga. Við erum langt komin með samningaviðræður við nokkra unga leikara, alveg frábæra. Við vorum upprunalega bara að leita að fólki í minni hlutverk en hann vildi samt hitta nokkra stærri leikara, sem ég kynnti hann svo fyrir,“ segir Andrea Brabin hjá Eskimó.

Sigurður Skúlason sló í gegn í prufunum og fékk í kjölfarið hlutverk í myndinni. Hann fór til Rússlands fyrir tveimur vikum í búningamátun, hár og förðun. „Hann mun svo halda til þeirra landa sem tekið verður upp í fyrir utan Ísland og leika í nokkra daga. Þannig að þetta er nokkuð stórt hlutverk. Það kom skemmtilega á óvart,“ segir Andrea. Ekki náðist í Sigurð í gær.

Ungu leikararnir eru fimm talsins og koma úr Listaháskóla Íslands. Þau verða í minni hlutverkum án texta, en hafa þó verið beðin um að senda mál af sér fyrir búninga. Þá er ekki loku fyrir það skotið að fleiri bætist í hópinn.

Mikil leynd er yfir myndinni. „Það liggur mikill trúnaður yfir handritinu. Sigurður er búinn að sjá það en bara af því að æfingar standa yfir. Það má enginn tjá sig um það að svo stöddu. En þetta er skemmtilegt verkefni og stórir aðilar sem koma að þessu,“ segir Andrea.

Endir myndarinnar er tekinn upp á Íslandi en tökur hér hefjast seinni partinn í október og standa í rúma viku. Svokallað B-Unit kemur hingað í lok mánaðar til að mynda og ferðast það vítt og breitt um landið og er tekið meðal annars úr þyrlum. Þær tökur verða svo meðal annars notaðar við tölvuvinnslu.

Aleksandr Sokurov hefur leikstýrt 47 verkum auk þess að skrifa handrit og hefur hann unnið til verðlauna á öllum helstu kvikmyndahátíðum heims, líkt og í Toronto, Montréal og Cannes. Hann hefur lengi verið leiðandi í rússneskri kvikmyndagerð og hafa myndir eins og Russian Ark, Father and Son, Aleksandra, The Sun, Mother and Son og fleiri vakið verðskuldaða athygli um allan heim.

kbs@frettabladid.is