Ljóðalestur og ostagerð

Í miðbæ Reykjavíkur er starfandi hámenningarklúbburinn Hveðrungarnir. Félagsmenn hittast mánaðarlega og ræða ljóðlist og bókmenntir, búa til osta og drekka púrtvín.

Hámenningarklúbburinn Hveðrungarnir er ljóða- og bókmenntaklúbbur skipaður fjórum snyrtilega klæddum ljóðaunnendum. „Snyrtilegur klæðnaður, vandað málfar og áhugi á bókmenntum eru inntökuskilyrði í Hveðrungana,“ segir Aron Bergmann Magnússon, listamaður, leikmyndahönnuður og einn fjögurra Hveðrunga.

„Þetta er hámenningarklúbbur. Við hittumst reglulega og lesum ljóð, ræðum bókmenntir, búum til osta og drekkum púrtvín. Mig vantaði afsökun til að gefa mér tíma til að lesa meira en ég hef gert upp á síðkastið. Maður er duglegri við lesturinn þegar maður er kominn með það markmið að klára eina bók fyrir næsta Hveðrungafund, maður má nefnilega ekki mæta ólesinn á fundi. Það er líka fínt að hittast bara og fá sér vínglas og vera menningarlegur,“ segir Aron um tilurð Hveðrunganna. Með honum í félaginu eru þeir Arnar Fells Gunnarsson, Viðar Kristinsson og Arnar Ingi Viðarsson.

Ljóðalesturinn á þó ekki hug þeirra allan því piltarnir búa einnig til sína eigin osta fyrir fundi. „Þetta er kreppuráð fyrir sælkera. Einn úr hópnum hafði lesið sér til um ostagerð og við ákváðum að prófa þetta fyrir einn fundinn og útkoman var æðisleg. Nú tekur við tilraunastarfsemi þar sem við ætlum að þróa okkur frekar í ostagerðinni og svo er einnig á döfinni að prófa brauðbakstur.“

Aðspurður segir Aron ostagerð ekki vera flókna. „Maður hitar mjólk, síar mysuna úr og einum og hálfum tíma seinna er maður kominn með fína smurosta, svo saxar maður mismunandi kryddjurtir og blandar við og þá er maður kominn með ljúffengan ost.“

Hveðrungafundir eru haldnir eins oft og tími gefst, stundum nokkrum sinnum í mánuði, og að sögn Arons hafa margir falast eftir inngöngu í hópinn.

„Nokkrum vinum okkar fannst hugmyndin skemmtileg og hafa sótt um inngöngu. Umsóknirnar eru til skoðunar enda þurfa menn að uppfylla öll inntökuskilyrðin.“ sara@frettabladid.is