„Afhverju hata þig allir Obama?“

Hinn tíu ára gamli Terence Scott sló sjálfan forseta Bandaríkjanna og friðarnóbelsverðlaunahafann Barack Obama, út af laginu í New Orleans á dögunum. Obama var á fundi með íbúum borgarinnar í borgarráðshúsinu þegar Terence kom upp á svið og fékk að spyrja forsetann einnar spurningar. Og hann hikaði ekki heldur spurði:

„Afhverju hata allir þig Obama?"

Obama brá við að heyra spurninguna og varð heldur afundin þegar hann svaraði honum til að hann væri jú forseti Bandaríkjanna og hafði því hlotið atkvæði meirihluta þjóðarinnar, því væri hann ekki beinlínis hataður af öllum.

Hann áréttaði síðan að það þyrfti reyndar ekki að horfa lengi á sjónvarpið til þess að sjá að þar væru meira eða minna allir reiðir þessa daganna.

Og Obama á ekki sjö dagana sæla því Repúblikanar gagnrýna hann harðlega fyrir að draga á langinn ákvörðun um að fjölga í hermannaliði Bandaríkjanna í Afganistan um 40 þúsund hermenn. Þá er hann einnig gagnýndur á vinstri vængnum fyrir að ganga ekki nógu langt í að tryggja samkynhneigðum mannréttindi á pari við þá gagnkynhneigðu.

Obama sagði síðan við hinn tíu ára gamla Terence að Bandaríkjamenn óttuðust að missa vinnuna sína auk þess sem hart væri tekist á um nýtt heilbrigðiskerfi í Bandaríkjunum.

„Og þegar það harðnar á dalnum þá verður einhverjum kennt um það og það er hluti af starfinu. En þú veist, ég er nokkuð harður náungi," sagði Obama við Terence að lokum.