Lagfærði húsið fyrir fimmfalt kaupvirði

Hannes Smárason gerði endurbætur á húsi sínu við Fjölnisveg 9 fyrir um 350 milljónir króna á þriggja ára tímabili, árin 2005 til 2007, að því er fram kemur í bókhaldi hans. Hann keypti húsið árið áður á 70 milljónir – fimmtung af því sem hann átti síðar eftir að leggja í húsið.

Þetta er meðal þess sem sjá má í úrskurði héraðsdóms, sem hafnað hefur kröfu Hannesar um að húsleitir á lögmannsstofunni LOGOS og Fjölnisvegi 9 og 11 yrðu úrskurðaðar ólögmætar.

Í fundargerðum skipulagsráðs Reykjavíkurborgar kemur fram að Hannes hafi meðal annars fengið leyfi til að tengja bílageymsluna að Fjölnisvegi 9 við bílageymsluna að Fjölnisvegi 11, með viðbyggingu, tengigangi og svölum. Einnig var honum heimilað að endurnýja þak hússins, breyta innra fyrirkomulagi á öllum hæðum þess, stækka eldhúsið með viðbyggingu, rífa skorstein og koma upp svölum á norðausturhlið hússins.

Að auki keypti Hannes tölvubúnað fyrir tæpar sjö milljónir í Fjölnisveg 9, og innbú fyrir fimmtán milljónir í Fjölnisveg 11.

Efnahagsbrotadeild Ríkislögreglustjóra rannsakar nú hvort skattsvik voru framin þegar húsin tvö, Fjölnisvegur 9 og 11, voru seld frá eignarhaldsfélagi Hannesar til Hannesar sjálfs og konu hans með þriggja milljóna tapi. Segir í greinargerð lögreglu að ætla megi að kaupin hafi „ekki verið gerð í ábataskyni heldur sé hugsanlega um málamyndagerning að ræða“.

Þá er einnig til rannsóknar hvort lög voru brotin þegar FL Group, sem Hannes fór fyrir, keypti flugfélagið Sterling af félaginu Fons árið 2005. Lögregla telur að Sterling hafi verið keypt á yfirverði, sem hafi valdið FL Group verulegu fjárhagslegu tjóni.

Helgi Magnús Gunnarsson segir að gagna hafi verið aflað vegna málsins, en ekki hafi verið leitað sérstaklega hjá Pálma Haraldssyni eða Jóhannesi Kristjánssyni, þáverandi eigendum Fons. Þeir hafi ekki heldur verið yfirheyrðir.

Fleiri meint brot eru til rannsóknar, meðal annars 46,5 milljóna dala lán FL Group til Hannesar, sem þá jafngilti um þremur milljörðum króna. Skömmu eftir lánveitinguna sögðu þrír fulltrúar sig úr stjórn FL Group.

stigur@frettabladid.is