Ballack færir þeim silfrið

„Síðast voru það Cannes-verðlaunin, sem Vínbúðarmyndin tók og síðan eru það þessi, þannig að þetta gengur vel,“ segir Samúel Bjarki Pétursson auglýsingaleikstjóri.

Þeir Gunnar Páll Ólafsson unnu nýverið hin virtu Telly Awards fyrir Samsung-auglýsingu sína með Michael Ballack í aðalhlutverki. Aug­lýsingin hefur áður unnið til verðlauna, en hún var valin ein af fimmtíu bestu auglýsingum í Bretlandi á síðasta ári, af auglýsingastofum Bretlands.

„Sá sem framleiddi auglýsinguna sendi hana inn í keppnina. Þannig að við vissum ekki einu sinni að við værum þátttakendur. En það er gaman að því. Maður verður að reyna að safna einhverjum verðlaunum til að koma sér áfram.“ Telly Awards eru mjög virt amerísk verðlaun og eru veittar viðurkenningar fyrir allt frá sjónvarpsþáttum til auglýsinga og er keppt í mörgum flokkum. Samsung auglýsingin fékk verðlaun í flokki auglýsingaherferða, „Business-to-Consumer“.

Verðlaunin eru í formi styttu sem er gerð af þeim sömu og gera Óskars­verðlaunastyttuna og Emmy-verðlaunin. „Ég held að það sé ekkert sem heitir gullverðlaun í þessari keppni, maður vinnur silfrið, sem er þessi verðlaunagripur.“ En eins og Íslendingum er alkunnugt er silfrið best. „Já, við erum í silfurliðunum. En það var voða skemmtilegt að sjá þessi verðlaun detta inn,“ segir Samúel.

En hvað er næst hjá drauma­teyminu? „Það eru einhverjar íslenskar auglýsingar fram undan og jafnvel einhverjar erlendar, en það er allt á vinnslustigi. Við vorum að klára auglýsingar fyrir Samtök iðnaðarins sem koma fyrir sjónir Íslendinga bráðum. Það er smá stund milli stríða núna, aðeins að endurhlaða batteríin. Við erum búnir að vera yfirbókaðir síðan um áramót þannig að það er sem betur fer ekki búin að vera mikil kreppa í þessu.“

Meðal verkefna má nefna risaauglýsingu í Tékklandi fyrir Kozel bjór sem er í eigu SAB Miller, framleiðanda Miller og Grolsch, en Fréttablaðið sagði frá því í maí. Samúel vill ekki staðfesta nein risaverkefni að þessu sinni; „en það er hitt og þetta á borðinu.“

kbs@frettabladid.is