Banaslys á Hringbrautinni

Ökumaður vélhjóls lést í umferðarslysi á mótum Hringbrautar og Birkimels, nálægt Þjóðarbókhlöðunni, um áttaleytið í gærkvöldi.

Vélhjólið var á leið austur Hringbrautina og féll ökumaðurinn af hjólinu. Fólksbíll á leiðinni vestur Hringbraut beygði suður Birkimel á sama tíma. Í gærkvöldi var ekki ljóst hvort vélhjólið hafi rekist utan í bílinn eða hvort ökumaðurinn hafi fipast og dottið, að sögn lögreglunnar á höfuðborgarsvæðinu. Vélhjólið kastaðist rúmlega eitt hundrað metra eftir Hringbrautinni í slysinu. Ökumaður fólksbílsins slapp ómeiddur en var fluttur á slysadeild þar sem honum var veitt áfallahjálp.

Þetta er sjötta banaslysið í umferðinni á þessu ári. Vaktstjóri hjá lögreglunni á höfuðborgarsvæðinu segir að vorin séu hættulegur tími varðandi vélhjól. Án þess að hafa ítarlegar tölur við hendina taldi hann að um eitt vélhjólaslys hefði orðið á dag síðustu vikur.

- kg