Úttekt Deloitte ekki birt fyrr en á þriðjudag

Úttekt endurskoðunarfyrirtækisins Deloitte sem kynna átti fyrir bæjarfulltrúm í Kópavogi í hádeginu í dag verður ekki kynnt fyrr en á þriðjudag. Úttektin snýr að viðskiptum Kópavogsbæjar við fyrirtækið Frjálsa miðlun sem er er í eigu Brynhildar Gunnarsdóttur, dóttur Gunnars Birgissonar, bæjarstjóra í Kópavogi.

„Ég held að þeir séu bara að vanda sig," segir Guðríður Arnardóttir, fulltrúi Samfylkingar í bæjarstjórn Kópavogs. Hún segir starfsmenn Deloitte hafa unnið hörðum höndum við gerð úttektarinnar. „Þetta er greinilega meira verk en þér héldu að það væri í byrjun," segir Guðríður.

Útgáfufélagið Frjáls miðlun hefur á síðustu fjórtán árum fengið rúmar 70 milljónir króna frá Kópavogsbæ fyrir ýmis konar verkefnavinnu fyrir bæjarfélagið. Meðal annars fyrir gerð ársskýrslna, kynningarefnis, bæklinga og önnur verkefni.