Pálmi í Fons: Þeir mega rannsaka allt mín vegna

,,Þeir mega rannsaka allt mín vegna, nema að ég þurfi að borga kostnaðinn sem hlýst af rannsókninni," segir Pálmi Haraldsson kenndur við Fons. Hann segist ekkert hafa að fela. Enginn hafi tapað meira á Sterling en Fons.

Fréttastofa greindi frá því í gær að efnahagsbrotadeild Ríkislögreglustjóra rannsaki nú hvort að Pálmi Haraldsson í Fons og Hannes Smárason hafi grætt milljarða á kostnað hluthafa í FL Group í tengslum við viðskipti á danska flugfélaginu Sterling.

runur leikur á að einhvers konar leynilegur samningur hafi legið fyrir milli Hannesar og Pálma um viðskiptin. Fons keypti Sterling í mars árið 2005 fyrir um 5 milljarða, sjö mánuðum síðar keypti FL Group flugfélagið á 14,6 milljarða.

Í desember ári síðar keypti Northern Travel Holding, félag að mestu í eigu Fons og FL Group, flugfélagið fyrir 20 milljarða. Sterling var lýst gjaldþrota í október á síðasta ári. Fréttastofa náði í dag tali af Pálma Haraldssyni sem telur ekki að hann sé aðili að þessu máli.

Það megi rannsaka allt hans vegna nema að hann þurfi að borga kostnaðinn sem hlýst af rannsókninni.

Veislan í kringum Fons hafi ekki verið meiri en svo að allt endaði í þroti.

Enginn hafi tapað meira á Sterling en Fons en tapið hafi verið á þriðja tug milljarða. Ekki hefur náðst í Hannes Smárason, þrátt fyrir ítrekaðar tilraunir.