Mönnum bjargað fyrir utan Sandgerði

„Auðvitað verður manni brugðið. Maður væri ekki heilbrigður annars. Ég hef verið á sjó síðan ég var krakki og veit hvað sjórinn getur gert. Hann gefur og tekur,“ segir Karl Einar Óskarsson, annar hafnsögumannanna sem voru hætt komnir þegar bát þeirra hvolfdi í innsiglingunni í Sandgerði í gær.

Varðskipið Týr hafði verið ásamt dráttarbátum að draga af stað togarann Sóleyju Sigurjóns, sem hafði strandað í innsiglingunni, og var búið að toga hátt í klukkustund þegar skipið losnaði. Samkvæmt tilkynningu Landhelgisgæslunnar voru það landfestar Sóleyjar, sem tengdar voru í hafnsögubátinn, sem drógu hann á hliðina þegar Sóley losnaði, en Karl Einar vill ekki fjölyrða um hvers vegna fór sem fór, ekki fyrr en eftir sjópróf.

Karl Einar var sjálfur úti á dekki og fór því beint í sjóinn. Hann var kominn í bát björgunarfélagsins Sigurvonar innan við hálfri mínútu síðar.

Skipstjóri bátsins, Aðalsteinn, var hins vegar inni í stýrishúsinu þegar bátnum hvolfdi og birtist ekki ofansjávar fyrr en eftir eina til tvær mínútur.

Guðmundur Ólafsson, formaður björgunarsveitarinnar Sigur­vonar, segir björgunina sem slíka hafa gengið vel, þangað til bátnum hvolfdi. „Það var svolítið sjokk,“ segir hann.

„Það eru sjálfsagt margar ástæður fyrir þessu. En það var verið að draga þrettán hundruð tonna skip og við vorum á tiltölulega mikilli ferð. Þú stoppar ekki þrettán hundruð tonn á einu augnabliki,“ segir Guðmundur.

Í gærkvöldi vann köfunarfélag að því að ná hafnsögubátnum úr höfninni með því að koma belgjum á hann. Togarinn Sóley er talinn óskemmdur og sigldi undir eigin vélarafli til hafnar.

„Þetta er mjög þykkt stál í honum, byggt fyrir ísinn við Grænland,“ segir Guðmundur. Ekki var vitað hvort olía hefði lekið úr togaranum í gær. klemens@frettabladid.is