Framtíðaráætlun lögð fram á sunnudaginn

„Varðandi ríkisfjármálin þá er búið að ákveða að á sunnudaginn klukkan eitt þá kynnir ríkisstjórnin og setur fram til umræðu, útlínur af því hvernig allur þessi pakki sem snýr að því að ná fjárlagahallanum niður geti litið út," segir Vilhjálmur Egilsson framkvæmdastjóri Samtaka atvinnulífsins en fundað var um stöðugleikasáttmálann í dag.

Lífeyrissjóðirnir, ASÍ og SA funduðu ásamt ríkinu frá klukkan tvö í dag. Þar var rætt á tveimur borðum annarsvegar um efnahags- og atvinnumál og svo ríkisfjármálin að sögn Vilhjálms.

Niðurstaða fundarins var sú að ríkisstjórnin kæmi með ásættanlega áætlun á sunnudaginn sem sýndi fram á hvernig þeir hygðust ná fjárlagahallanum niður.

„Það þarf að fá ítarlega áætlun og hún þarf að vera það efnismikil að hægt sé að taka grundvallaákvarðanir hvernig ná eigi hallanum niður," segir Vilhjálmur um þessa áætlun sem stendur til að kynna á sunnudaginn. Hann segir jafnframt að það þurfi að vera mikill og víðtækur stuðningur við hana.

Spurður hvort hugsanleg lending Icesave deilunnar sem kom í ljós í dag hafi áhrif á viðræðurnar segir Vilhjálmur: „Það hjálpar til ef málið með Icesave leysist farsællega."