Ríkið ber ekki kostnað

Þingmenn Framsóknarflokksins reyndu á Alþingi í gær að sannfæra stjórnarliða um ágæti tillögunnar um afskriftir hluta lána heimila og fyrirtækja. En allt kom fyrir ekki; stjórnarliðar sátu við sinn keip.

Sigmundur Davíð Gunnlaugsson, formaður Framsóknarflokksins, mælti fyrir þingsályktunartillögu flokks síns. Sagði hann rangt, sem haldið hefur verið fram, að gríðarlegur kostnaður falli á ríkið verði leiðin farin.

Í raun væri verið að lágmarka tap. Ekki væri um fjármagn ríkisins að ræða heldur lán sem bankarnir veittu og fjármögnuð voru af erlendum kröfuhöfum gömlu bankanna. Þau teljist nú að miklu leyti töpuð enda gangi skuldabréf þeirra kaupum og sölum á broti af upphaflegu verði.

Sú staðreynd ætti að gefa tilefni til afskrifta gagnvart þeim sem tóku lánin.

Steingrímur J. Sigfússon fjármálaráðherra sagði það ákaflega fallega hugsun að vilja leiðrétta þessi mál í heild sinni, líkt og hverja aðra skekkju. Sérstaklega ef menn héldu að það kostaði ekki neitt.

En hann gæti ekki með nokkru móti séð að sú væri raunin. Það gæti ekki orðið útgjaldalaust fyrir ríkissjóð að færa niður eignasöfn upp á hundruð milljarða.

Undir lok máls síns lét Steingrímur að því liggja að tillaga Framsóknarflokksins væri alls ekki raunhæf.- bþs