Halda sig vel innan línunnar

Búið er að veiða sjö hrefnur frá því að veiðar hófust 26. maí. Fjórar veiddi áhöfn Jóhönnu ÁR á miðvikudaginn.

„Það hefur allt gengið vel, vinnslan og skurður um borð. Salan er líka framar vonum,“ segir Gunnar Bergmann Jónsson, framkvæmdastjóri Félags hrefnuveiðimanna.

Hvalaskoðunarfélag Íslands sendi frá sér yfirlýsingu í gær þar sem sagt er að Jóhanna ÁR hafi verið alltof nálægt hvalaskoðunarskipum á miðvikudaginn.

„Hvalaskoðunarsamtök Íslands ítreka að veiðar og hvalaskoðun geta ekki farið saman og það að leyfa veiðar í svo mikilli nálægð við svæðin eins og raun ber vitni er fásinna, nema að tilgangurinn sé að gera út af við hvalaskoðun á Íslandi,“ segir í yfirlýsingunni.

Gunnar Bergmann segir Jóhönnu ÁR alltaf vera langt fyrir utan svæðin sem kölluð eru hvalaskoðunarsvæði.

„Þeir verða bara að passa sig að halda sig innan þessarar línu sem liggur í kringum 12 mílurnar,“ segir Gunnar. Í reglugerð eru hvalveiðar á tilteknum svæðum bannaðar.

Stefnt er að því að klára hrefnukvótann, hundrað dýr, í sumar og haust. Af þeim sjö dýrum sem veiðst hafa eru fimm tarfar og tvær kýr.

„Kjötið af kvendýrunum er betra. Við veiddum þær utarlega og munum fara þangað meira í sumar. Við höfum verið að fara 50 mílur út frá Gróttu og þar er allt krökkt af hrefnu,“ segir Gunnar Bergmann. - vsp