Þrjár bruggverksmiðjur spruttu upp með stuttu millibili

Þrjár litlar dreifbýlis bruggverksmiðjur hafa á skömmum tíma sprottið upp hérlendis og sú nýjasta í Stykkishólmi kom með sinn bjór á markað í vikunni sem efnahagskerfið hrundi í haust. Eigendur segjast þó ekki trúa öðru en að fyrirtækið lifi.

Það var 30. september í haust sem Brugghúsið Mjöður í Stykkishólmi sendi fyrstu kassana af Jöklabjórnum í verslanir ÁTVR. Norðanlands hafði bruggverksmiðjan á Árskógssandi riðið á vaðið fyrir þremur árum með Kalda, síðan komu Sunnlendingar með Skjálfta, og engu var líkara að nýjasta æðið væri runnið á landann, - allir ætluðu að framleiða bjór.

Mjöður er í eigu tvennra hjóna í Stykkishólmi. Bruggmeistari er Hvergerðingurinn Magnús Stefánsson, sem er að flytja heim til Íslands með fjölskylduna eftir að hafa starfað í bruggverksmiðju í Danmörku um árabil. Fyrir lítið bæjarfélag sem Stykkishólm munar um störfin sem svona fyrirtæki skapar.

Nýjasta afurðin er Skriðjökull, en hann er það sem kallast milli dökkur bjór eða rauðleitur. Byrjað var á framleiðslu Jökuls í haust, sem er ljós og mildur bjór.