Undrast að íslenskir ráðherrar ætli ekki að hitta Dalai Lama

„Sú spurning leitar á mann," segir Birkir Jón Jónsson, varaformaður Framsóknarflokksins, þegar hann er spurður að því hvort hræðsla við kínversk stjórnvöld valdi því að enginn úr ríkisstjórn Íslands ætlar að funda með Dalai Lama, andlegum leiðtoga Tíbeta, sem dvelur hér á Íslandi næstu daga. Hann kemur til landsins í kvöld og fer á miðvikudag. Hann hefur dvalið í Danmörku undanfarna daga og meðal annars hitt Lars Løkke Rasmussen, forsætisráðherra Dana. Kínversk stjórnvöld mótmæltu fundi Rasmussen með honum við litlar undirtektir danskra stjórnmálamanna.

Birkir undrast að enginn úr ríkisstjórn Íslands ætli að hitta Dalai Lama. „Það vekur mig furðu, sérstaklega í ljósi sögu þessa lands og þeirrar baráttu sem þau hafa háð, að forystumenn í ríkisstjórn Íslands skuli ekki sýna fulltrúa þeirrar þjóðar þá viðleitni að hitta viðkomandi og heyra sjónarmið hans. Við erum jafnframt að tala um þann einstakling sem helst hefur talað fyrir friði í heiminum," segir Birkir og kveðst telja það merkilegt sjónarmið að vilja ekki hlusta á einstakling sem hefur verið jafn ötull talsmaður friðarsjónarmiða.

Dalai Lama mun funda með utanríkisnefnd og forseta Alþingis á þriðjudaginn.