Virkjunin sem átti að bjarga búrekstrinum orðin skuldahelsi

Hún kallast Lindavirkjun og er mjög óvenjuleg enda sprettur vatnið fram úr lindum á þremur stöðum í 350 metra hæð uppi í fjalli. Vatnið frýs aldrei og er alltaf þriggja stiga heitt. Það var fyrir þremur árum sem hjónin á Gríshóli í Helgafellssveit réðust í það verkefni ásamt sonum sínum að virkja lindirnar. Steyptar voru þrjár stíflur og lögð tveggja kílómetra löng stálpípa niður að litlu stöðvarhúsi en þannig fæst 230 metra fallhæð. Þar inni framleiðir ein túrbína sexhundruð kílóvött raforku, sem seld er inn á dreifikerfið. Með þessu átti að treysta framfærslu fjölskyldunnar.

Magnús Guðmundsson bóndi segir að þetta hafi í upphafi litið vel út, áður en gengið féll, því virkjunin hafi verið byggð fyrir erlend lán. Gengi evrunnar hafi verið 76 krónur þegar verkið hófst. Nú sé evran komin í 175 krónur. Skuldirnar hafa sem sagt hækkað hrikalega.

Magnús segir grátlegt að mönnum hafi verið att út í svona og segist hafa verið heimskur að hafa gert þetta. Hann segist ekki vita hvort fjölskyldan missi jörðina.

"Það fer eftir því hvað landbúnaðarráðherrann verður duglegur. Hann er nú sveitungi minn," segir Magnús. "Hann kannski verður duglegur. En ég þarf að hitta hann og spyrja hann hvað hann ætli að gera við þetta hjá mér."