Andarvarpið á Reykjavíkurtjörn gæti heppnast betur

Vísbendingar eru um að varp andarfugla við Reykjavíkurtjörn muni heppnast betur í sumar en á fyrri árum, að mati Gunnars Þórs Hallgrímssonar líffræðings.

Afkoma andarunganna á Tjörninni hefur ekki verið með besta móti undanfarin ár. Gunnar segir að þetta skýrist meðal annars af því að ætisskortur hafi verið hjá sílamávnum. Hann hafi því sótt meira inn í borgina en ella og étið ungana. Þá hafi Tjörnin verið tæmd fyrir tveimur árum og það gæti hafa haft slæm áhrif á þá hryggleysingja sem andarungarnir lifa á. „Því að þeir lifa aðallega á hryggleysingum. Það er að segja mýi og smákrabbadýrum," segir Gunnar.

Gunnar segir að horfur séu á þokkalegu mávavarpi í ár. „Þeir byrja allavega að verpa á réttum tíma og það er meiri ró yfir þeim en áður," segir Gunnar. Mávurinn sé því ólíklegri til að leita inn í borgina og á Tjörnina og fyrri ár. Það fari þó allt eftir því hvernig staðan verði á æti í sjónum fyrir mávinn. Gunnar ítrekar þó að mávurinn sé ekki eini þátturinn sem hafi áhrif á andavarpið. Staðan á botndýralífinu í Tjörninni verði að vera góð ef vel á að takast til.