Fleiri skip til rækjuveiða

Ólafsvíkurbáturinn Arnar í Hákoti er að koma inn til Grundarfjarðar með fjögur tonn af rækju sem fengust í Breiðafirði. Á sama tíma er verið að landa úr togaranum Sigurborgu, sem kom með 34 tonna rækjufarm úr Kolluál út af Snæfellsnesi. Undanfarin ár hafa einungis sex-sjö skip og bátar verið á rækjuveiðum hérlendis og heildarveiðin numið aðeins fáum prósentum af því sem mest var fyrir síðustu aldamót.

Sjómennirnir um borð í Sigurborgu rekja þennan aukna áhuga einkum til hærra afurðaverðs vegna gengislækkunar krónunnar og segjast hafa ágætt upp úr veiðunum.

Arnar í Hákoti er einn af síðustu trébátunum á Íslandsmiðum en hann er að byrja í rækjunni ásamt nokkrum öðrum skipum. Í ár verða í kringum tólf skip á rækjuveiðum, þar af nokkrir togarar. Þá er verið að gangsetja rækjuverksmiðjur á ný, meðal annars á Siglufirði. Aflinn úr Sigurborgu var settur í flutningabíl sem ók honum til Sauðárkróks í rækjuvinnsluna Dögun.