Staðfestir viðræður borgarinnar við lífeyrissjóði

Reykjavíkurborg á nú í viðræðum við lífeyrissjóði um 5 milljarða króna lán til mannaflsfrekra framkvæmda á þessu ári. Borgarstjóri segist vonast til að viðræður vegna lántöku skili árangri sem fyrst. Birgir Björn Sigurjónsson, fjármálastjóri Reykjavíkurborgar, staðfesti þetta í samtali við fréttastofu.

Fjárfestingaáætlun borgarinnar gerir ráð fyrir framkvæmdum fyrir samtals um 7 milljarða króna á þessu ári. Einn milljarður hefur þegar verið fenginn að láni, og með þessum 5 milljörðum til viðbótar vantar þá enn rúman milljarð upp á heildarfjárhæðina.

Meðal þeirra framkvæmda sem hér um ræðir er Sæmundarskóli og Norðlingaskóli. Þá gerir umrædd lánsfjárhæð borginni einnig kleift að byggja leikskóla og grunnskóla í Úlfársárdal.

Einnig er gert ráð fyrir að fjármunirnir nýtist til ýmiss konar umferðarúrbóta á höfuðborgarsvæðinu í samstarfi við Vegagerðina. Ef lánið frá lífeyrissjóðunum fæst munu framkvæmdir á horni Austurstrætis og Lækjargötu og við Laugaveg 4-6 einnig hefjast á fullu.

Í samtali við fréttastofu sagði Hanna Birna Kristjánsdóttir borgarstjóri að fyrirhuguð lántaka væri í samræmi við fjárhagsáætlun Reykjavíkurborgar og til þeirra framkvæmda sem þar er gert ráð fyrir. Hún segist vonast til þess að viðræður vegna lántöku skili árangri sem fyrst.