Lægsta tilboð 45,3% af kostnaðaráætlun

Verkfræðistofur eru tilbúnar að gefa mikinn afslátt til að fá verkefni, ef marka má tilboð sem Vegagerðin opnaði í gær í eftirlit með byggingu nýrrar brúar á Hvítá í Árnessýslu. Lægsta tilboð reyndist aðeins 45,3 prósent af kostnaðaráætlun. Það kom frá VSÓ - Ráðgjöf ehf. í Reykjavík, sem býðst til annast eftirlitið fyrir aðeins 4,3 milljónir króna. Kostnaðaráætlun hljóðaði upp á 9,6 milljónir króna.

Alls buðu tíu verkfræðistofur í verkefnið. Tvö önnur boð reyndust undir kostnaðaráætlun, frá Guðmundi Þ. Björnssyni, Kópavogi, upp á 6,3 milljónir króna, og frá Strendingi ehf. í Hafnarfirði, upp á 7 milljónir króna.

Sjö tilboð voru hins vegar yfir kostnaðaráætlun, það hæsta átti Almenna verkfræðistofan, upp á 18,6 milljónir króna. Verkið felur í sér eftirlit með byggingu 270 m langrar steyptrar bitabrúar í sex höfum með heildarbreidd 10 metrar á Hvítá á Bræðratunguvegi, milli Reykholts í Biskupstungum og Flúða í Hrunamannahreppi.

Gert er ráð fyrir að brúin verði byggð í tveimur hlutum og að Hvítá verði haldið utan vinnusvæðis á byggingartímanum. Framkvæmdir eiga að hefjast í sumar og verklok við brúarsmíði eru áætluð haustið 2010.