Fá lægri laun ef þeir endurráða sig

Bankastjórar ríkisbankanna verða að gera það upp við sig hvort þeir verða endurráðnir á lægri launum en forsætisráðherra eða hætta. Tillögur ríkisstjórnarinnar um lægri laun hjá ríkinu ná ekki til forseta Íslands.

Í stefnuyfirlýsingu ríkisstjórnarinnar segir að marka eigi þá stefnu að engin ríkislaun verði hærri en laun forsætisráðherra. Jafnframt að sjálfstæðum hlutafélögum í eigu ríkisins verða settar skýrar reglur um launastefnu í þessum anda. Til að hægt verður að ná þessu fram þarf í einhverjum tilfellum að breyta lögum og í öðrum samningum. Fjármálaráðherra setti í morgun vinnu í gang til að skoða hvernig staðið verður að því að lækka hæstu laun hjá ríkinu.

Laun forsætisráðherra eru í dag 935 þúsund krónur og til að þetta gangi eftir er ljóst að ýmsir þurfa að taka á sig skerðingu. Svo sem bankastjórar ríkisbankanna, forstjóri Íbúðalánasjóðs og forstjóri Landspítalans.

Steingrímur J. Sigfússon fjármálaráðherra segir að reynt verði að semja við þessa aðila um lægri laun en verið sé að fara yfir réttindi þeirra til að kanna hvernig hægt sé að standa á launalækkunum. Steingrímur segir að ein leið sem verði farin verði sé til að mynda að ráða ekki inn í störf á hærri launum en sem nemur launum forsætisráðherra. Þetta eigi við um það þegar ráðið verður í störf bankastjóra ríkisbankanna sem auglýst verða á næstunni. Fjármálaráðherra segir stefnuna um ríkislaun ekki eiga við um laun forseta Íslands.